3 НВО САЕМ – ФОРУМ НА ГРАЃАНСКОТО ОПШТЕСТВО ВО МАКЕДОНИЈА

Мобилизација на граѓанското општество – примарна цел на НВО-секторот

Првата носечка тема во Форумскиот дел на 3 НВО Саем – форум на граѓанското општество во Македонија “Како до мобилизација на граѓанското општество?” е посветена на процесот на вмрежување на граѓанските асоцијации - начин на работа кој е се’ поактуелен, посебно поради ефикасни примери на мрежи кои се активираа околу специфични прашања.

Македонија се соочува со предизвикот на Рамковниот договор, сиромаштијата, реформите во јавната администрација и сервисите. Целта на форумската расправа е да ги посочи активностите кои би требало да бидат преземени во функција на мобилизација на граѓанското општество, да се воочат главните пречки и да се види какви се искуствата од земјите од регионот. Расправата ќе започне во 13 часот и ќе трае до 15,30 часот во сала А на Скопски саем. Воведничари во темата ќе бидат Ѓунер Исмаил, Зоран Костов, Владимир Милчин, Јован Донев, Живка Василевска, а претседавач Нафи Сарчини.

Вториот саемски ден од 12 до 14,30 часот, во сала А, ќе се расправа за темата “Како до стратегија за дијалог и соработка меѓу државата и граѓанскиот сектор?”. Темата е иницирана од фактот дека во изминативе десет години поголемиот дел од граѓанските организации, својата соработка и поддршка ја остваруваа со меѓународните организации, а ќе биде спомената и слабата соработка и поддршка од државата, која главно, се должи на лошата економска состојба и неколкуте кризи кои последователно се случуваа. Во периодот кој претстои, граѓанските асоцијации ќе треба да се фокусираат врз потрага по одомаќени концепти и практики на граѓанското општество. Учесниците во расправата ќе се обидат да дадат одговор на прашањата: дали постои интерес за дијалог и соработка меѓу граѓанските асоцијации и државата, какви активности преземаат граѓанските организации и државата за воспоставување соработка и какви се искуствата од земјите од регионот. Воведничари во темата ќе бидат Радмила Шеќеринска, Сашо Клековски, Нафи Сарачини и Бела Јагасик, а претседавач Владимир Милчин.

Вториот саемски ден, од 17,30 до 19 часот ќе биде одржана форумска расправа за “Промени во законот за здруженија на граѓани и фондации – организација од јавна полза”. На трибината ќе се разговара за усвоениот Акциски план за спроведување на препораките од извештајот за стабилизација и асоцијација на европската комисија за РМ за 2003 година од страна на Владата, за пропустите во актуелниот Закон за здруженија на граѓани и фондации, донесен во 1998 година, за тоа што претставува организација од јавна корист и какво е искуството во земјите од регионот во однос на организации од јавна корист. Воведничари во темата ќе бидат Борче Давитковски, Наташа Габер-Дамјановска и Даг Ратцен, а претседавач Жарко Коневски.

Форумската расправа, посветена на “Вистините и заблудите во граѓанскиот сектор” ќе се одржи на 22, ноември, од 12,30 до 15 часот во сала А. На неа ќе се реасправа за корупцијата, која претставува еден од проблемите што го ограничуваат развојот во земјата и е тесно поврзана со намален економски развој на земјата. Прашањето на корупција, секако не го одминува и граѓанскиот сектор и јавноста многу често граѓанските асоцијации ги доживува како продолжена рака на странските интереси и го намалува легитимитетот на нивното постоење. Воведничари во темата ќе бидат Ило Трајковски, Зоран Јачев, Роберт Поповски, Трајко Славевски и Сашо Клековски, а  претседавач Мирко Спироски.