ОТВОРЕН ТРЕТИОТ НВО САЕМ - ФОРУМ НА ГРАЃАНСКОТО ОПШТЕСТВО НА МАКЕДОНИЈА

Свечено отворање

Во Управната зграда на Скопски саем, денеска, свечено беше отворен третиот НВО Саем - Форум на граѓанското општество на Македонија. Саемот и годинава е во организација на Македонскиот центар за меѓународна соработка (МЦМС), во соработка со фондацијата Институт отворено општество Македонија (ФИООМ) и Институтот за трајни заедници (ИТЗ).

- "Во современите држави не е измислен подобар модел за контрола и надополнување на честите превиди во политиката од моделот на невладините граѓански организации, кои поаѓајќи од индивидуалните и колективни интереси се организираат за да ги подобрат сопствениот живот, нивото и квалитетот на демократијата во сопствената средина", рече претседателот Борис Трајковски, во своето воведно излагање на отворањето на тридневниот НВО саем - Форум на граѓанското општество во Македонија што се одржува во Скопје.
Според Трајковски, динамиката на невладиниот сектор дава непроценлив придонес во создавањето демократска и цивилна Република Македонија. Потенцирајќи ја улогата на организациите и поединците од НВО во напорите на Македонија за членство во евроатлантските интеграции, шефот на државата подвлече дека не постои пример во ниту една европска земја што станала членка на НАТО или на Европската унија каде државните органи и невладиниот сектор заедно не ја одработиле таа комплексна задача. Во процесот на градење надпартиски или меѓуетнички консензус, државата и политичките субјекти немаат доволно потенцијали самите без поддршка на невладините организации, нужниот општествен договор да го направат доволно силен и отпорен. Трајковски ги предупреди, граѓанските асоцијации за можноста од странична политичка манипулација и покрај, како што рече, нивните искрени намери за придонес на државните интереси.
"Не постои подобар начин од оној во кој граѓаните индивидуално или преку нивните организации ќе бидат контролор на политиката, но и поттик за политичарите многу поодговорно и поквалитетно да ја вршат својата работа", рече претседателот Трајковски, истакнувајќи дека на Македонија и се потребни граѓани со интегритет, поединци кои мислат со своја глава и не се подготвени да ја продаваат својата свест. На крајот од своето обраќање шефот на државата им порача на граѓанските организации да соработуваат меѓу себе во функција на нивната заедничка кауза и никогаш да не отстапуваат од борбата за интересите.
Донато Кјарини, шеф на делегацијата на Европската комисија во Македонија, се осврна на улогата на невладините организации во процесот на евроатлантска интеграција.
Првиот човек на ФИООМ, Владимир Милчин, истакна дека целта на Форумот е да се обезбеди простор за презентирање на граѓанските иницијативи што, пак, ќе овозможи комуникација меѓу граѓаните и граѓанските здруженија, а преку предвидените јавни дебати, панел дискусии и тркалезни маси јавноста ќе биде информирана за активностите на невладините организации во земјава.