Награди за граѓанско општество и демократија и одржлив развој

МЦМС ги прогласи овогодинештните лауреати

Македонскиот центар за меѓународна соработка (МЦМС) синоќа (8 јуни), во хотелот Холидеј ин, ги прогласи добитниците на Наградата за граѓанско општество и демократија и Наградата за одржлив развој „Херт Јан ван Апелдорн“.

Добитници на Наградата за граѓанско општество и демократија се: Аце Коцевски за долгогодишен придонес, Европско движење во Република Македонија за постигнувања во претходната година и ОЖ „Радика“ за соработка.
Наградата за одржлив развој „Херт Јан ван Апелдорн“ ја добија: Виолета Томовска и Михаил Токарев за долгогодишен продонес и „Специјална олимпијада“ за постигнувања во претходната година.

Македонскиот центар за меѓународна соработка (МЦМС) ги воспостави Наградата за граѓанско општество и демократија и Наградата за одржлив развој Херт Јан ван Апелдорн, за признание на храброста и на посветеноста на многу лица и организации во поддршката на демократските вредности, на граѓанското општество и на одржливиот развој.

Наградите, оваа година, се доделуваат по четврти пат. Добитниците на наградите се извонреден пример и извор на инспирација за сите нас. Тоа што е постигнато досега сигурно не ќе беше возможно без придонесот на голем број посветени жени и мажи кои работат на поддршка на демократијата, на граѓанското општество и на одржливиот развој. Ние сме свесни дека тие процеси се далеку од завршени, тие се во својот зачеток.

Оваа брошура ги слави годишниве добитници. Сакаме годишнава церемонија да биде настан кој ги одбележува активностите на заслужените добитници.
 
Аце Коцевски е добитник на Наградата за граѓанско општество и демократија за долгогодишен придонес. Наградата е доделена за придонес во граѓанското општество со јакнење на учеството и влијанието на луѓето, индивидуално или колективно, во одлуките и процесите кои се однесуваат на нив и за придонес во доброто владение со јакнење на локалната самоуправа (вклучувајќи граѓанско учество во локалната демократија). Аце Коцевски во својата долгогодишна активност како пратеник, јавен службеник и градоначалник дава посебен придонес во вклучувањето на граѓаните во одлучувањето. Една од клучните активности е поддршка на граѓаните на Велес во учеството и влијанието на прашањето на Топилницата во Велес (МХК Злетово). Заедно со локалните граѓански организации „Друштвото на родителите за грижа за здраво поколение“, „Здружението на родителите на децата заболени од церебрална парализа“ и „Порака“ учествуваат во разрешување на најголемиот еколошки проблем во Велес (и Македонија), преземаат иницијативи до највисоките владини институции и на меѓународно ниво, како и преземаат конкретни активности за подобрување на квалитетот на животната средина во Велес. Аце Коцевски, како јавен службеник и градоначалник, даде голем придонес во јакнење на локалната самоуправа и децентрализација. Велес е избрана „општина за пример“ каде се реализираат сите пилот проекти од децентрализација на власта.

Европското движење во Република Македонија (ЕДРМ) е добитник на Наградата за граѓанско општество и демократија за придонес во претходната година. Наградата е доделена за придонес во граѓанското општество со  јакнење на капацитетот на луѓето да ги одредат сопствените вредности и приоритети и да се организираат за да дејствуваат кон остварување на тие вредности и приоритети. ЕДРМ во 2003 дава посебен придонес во афирмација на европската идеја и евроинтергарциите. Тоа низ активностите како „Европа-нашата иднина“ (двонеделни манифестации низ Македонија по повод 9-ти мај – Денот на Европа) и Европска недела во средните училишта - „Знаејќи повеќе за Европа и Европската унија, знаеме повеќе за нас“. Во јуни 2003 година ЕДРМ беше иницијатор и организатор на меѓународен настан на Претседателите на Европските движења на земјите од Југоисточна Европа за соработката во процесот на евро-интегрирањето на која беше усвоена заедничка Резолуција во пресрет на Самитот на ЕУ што се одржа во Солун.

ОЖ „Радика“ е добитник на Наградата за граѓанско општество за  соработка. Наградата е доделена за придонес во градење  врски, мрежи, размени, комуникација меѓу организациите во граѓанскиот сектор и со државниот и приватниот сектор. ОЖ „Радика“ придонесе за градење мрежи, размени, комуникација со месните заедници (12 ограноци) и општина Ростуше, и Македонското женско лоби. ОЖ „Радика“ работи во исклучително пасивно подрачје (реканскиот крај).

 Виолета Томовска е добитник на наградата за унапредување на развојот на луѓето, со локални и национални иницијативи во сектори, како образованието, здравствената заштита и социјалната грижа. Таа како претседател на „Животна искра“ и во соработка со низа други граѓански организации, како и поради личното искуство, активно е вклучена во поддршката на жените заболени од ракот на дојката, насочени во борбата за превенција и намалување на заболувањата.

 Д-р арх. Михаил Токарев е добитник на наградата за промоција и поддршка на развојот што води во долгорочни резултати за луѓето и за околината, без притоа да се создаваат обврски и дисбаланси за идните генерации. Од 1989 година па наваму, Михаил Токарев со голема упорност и знаење се залага за спроведување на одржливиот развој во РМ, како во областа на заштитата и унапредувањето на животната средина, така и во заштитата и ревитализацијата на градителското, културно-историското и природното наследство. Тој е главен иницијатор и прв претседател на ДЕМ, кога во рок од една година Движењето беше омасовено (од 10+3 на 20+6 членки) и кога беа организирани меѓународни активности за заштита на Дојранското и на Охридското Езеро, а по неколку години и на Преспанското Езеро.

„Специјална олимпијада“ – Македонија е добитник на наградата за промоција и поддршка на правото на поединците, групите и луѓето да учествуваат, да придонесуваат и да уживаат во континуиран економски, социјален, културен и политички развој, во кој сите во потполност ќе ги остварат своите човекови права и фундаментални слободи. Во текот на 2003 година „Специјална олимпијада“ иницира кампања за вклучување на лицата со ментален хендикеп во секојдневните текови на живеење преку нивно активирањена разни спортски активности. Досега повеќе од 600 лица активно се вклучени.