Настани Животна средина : ЕД Флора, Крива Паланка

Еколошко-едукативен камп

Во периодот од 31 август до 04 септември годинава, во организација на Еколошкото друштво Флора од Крива Паланка, се одржа Еколошко-едукативен камп. Местото на одржување беше манастирскиот комплекс Јоаким Осоговски, а на него учество зедоа средношколци и студенти од целата држава.

Спроведените активности беа од едукативен и работен карактер. Едукативниот дел опфати неколку теми: „Манастирот низ вековите“, „Работата и значењето на граѓанските организации“; „Комуникациски вештини“; „Изработка и водење проекти“; и, „Местоположбата и биодиверзитетот на Осоговските Планини“.
Работниот дел помина со практични активности, како што се отстранување на отпадоците од манастирскиот комплекс и неговата околина, околните излетнички места, и обнова на руинираниот манастирски инвентар (клупи, маси корпи…).

Како што изјавија од подмладокот на ЕД Флора, причината за организирање на Кампот е сe поголемата туристичка посетеност на манастирскиот комплекс и несовесното еколошко однесување на овие посетители кои зад себе оставаат голем отпад.

Подмладокот на ЕД Флора ќе продолжи со активностите за чистење на околината на Манастирот, вклучувајќи и активисти од Скопје, од Куманово и од Пробиштип, како и членови на други граѓански организации од Крива Паланка.

Д.М.