ИНФОРМАТИВЕН ЦЕНТАР ЗА ГРАЃАНСКО ОПШТЕСТВО

Примена на Европската Kонвенција за човековите права

На 28 февруари годинава Информативниот центар за граѓанско општество имаше промоција на книгата „Влијанието на Европската конвенција за заштита на човековите права врз националното право и практика”, како и осврт на успешното реализирање на проектот „Практична примена на Европската конвенција за човекови права”.

Водени од фактот дека Европскиот суд за човекови права е институција која дава можност поединецот да побара правда доколку во некоја држава членка на Советот на Европа му се нарушени човековите права, Информативниот центар за граѓанско општество ја започна пионерската работа на ова поле во 1997 година и ја заокружи во 2001 година, организирајќи повеќе специјалистички семинари за адвокати (при што беа обучени над седумдесет адвокати и други професионалци), објавувајќи ја најрелевантната литература од оваа област и дистрибуирајќи ја до сите релевантни и заинтересирани фактори во земјава, и конечно реализирајќи две успешни интервенции на национално ниво преку системите на Европскиот суд за човекови права.

Публикацијата „Влијанието на европската конвенција за заштита на човековите права врз националното право и практика” се обидува да прикаже на кој начин дејствувањето на Европскиот суд за човекови права, кој функционира веќе педесетина години, влијае врз националното законодавство и врз правната практика на земјите членки на Советот на Европа. Во неа се застапени и случаите поднесени пред овој суд против Република Македонија во периодот од 1998 (од моментот на формално стапување во сила на Европската конвенција за човекови права во нашава земја) до 2001 година. Оваа ретроспектива на јасен начин покажува во која мера оваа материја е нова за професионалците од земјава и во која мера е потребно доостручување за да може успешно да се „ракува„ со јурисдикцијата на Европскиот суд во Стразбур.

Серијата семинари „Практична примена на европската конвенција за човекови права” како и издавањето на публикацијата ”Влијанието на Европската конвенција за заштита на човековите права врз националното право и практика” беа финансиски поддржани од холандската организација Пакс Кристи.

Посебна благодарност за несебичното пренесување на своето знаење и искуство при реализацијата на семинарите беше изразена до г-ѓа Маргарита Цаца Николовска, судија во Европскиот суд за човекови права.


Е.Нурединоска