Календар
1 декември

ДЕН ПРОТИВ СИДАТА

Превентивно против болеста

Првиот ден од последниот месец во годината е посветен на глобалните активности насочени кон борба против СИДА-та. Во борбата против оваа опасна заразна болест, како и секогаш, акцент е ставен на превенцијата. Македонските здруженија на граѓани кои работат на ова поле денот ќе го одбележат со кампањи и едукативни активности.

3 декември
ДЕН НА ХЕНДИКЕПИРАНИТЕ

Можност за рамноправен живот

Трети декември секаде во светот се одбележува како меѓународен датум посветен на хендикепираните лица. Во светот се покренуваат активности за олеснување на животот на хендикепираните лица и овозможување тие да го остварат своето право на рамноправен живот. Да им дадеме поддршка на оние кои во Македонија се трудат да го зголемат мошне ниското ниво на правата на овие лица. 

10 декември
ДЕН НА ЧОВЕКОВИТЕ ПРАВА
Еднаков третман за сите

И по неколку децении изминати од донесувањето на Декларацијата на ООН за човековите права, тие и натаму се кршат насекаде во светот. На овој ден, посветен на светската борба за почитување на човековите права, треба сите да се осврнеме кон сите кои се маргинализирани или обесправени и да се вклучиме во активностите за подеднаков третман на сите луѓе.

7-8 декември

 МЦМС

Обука за проектен циклус...

МЦМС ќе одржи обука за раководење со проектен циклус, како дел од Програмата за оспособување на заедниците и институциите. Обуката ќе се одржи во Маврово, а претставува втор дел од обуките наменети на претставниците на локалната самоуправа и на невладините организации.

13-15 декември

... За подготвување проекти...
Во рамките на Програмата за оспособување на заедниците и институциите, МЦМС ќе одржи уште една обука - за подготвување  проекти во заедниците. И оваа обука е наменета за претставниците на локалната самоуправа.

15-17 декември...

И за управување со човечки ресурси
МЦМС ќе одржи уште една обука, овој пат за управување со човечки ресурси. Оваа обука е наменета за здруженијата на граѓани кои работат со следните целни групи: жени, етнички малцинства, хендикепирани и млади лица.

20-22 декември
МРФП
Раководење со проектен циклус
Македонската развојна фондација за претпријатија ќе одржи обука за раководење со проектен циклус. Обуката ќе се одржи во Скопје, а наменета е за заинтересирани претставници на здруженија на земјоделци и на претприемачи.

29 декември
ДЕН НА БИОДИВЕРЗИТЕТОТ
Да се сочува биолошката разновидност
Светскиот ден посветен на биолошката разновидност на нашата планета има за цел да потсети на трендот на осиромашување на таа разновидност и на забрзаното исчезнување на многу животински и растителни видови. Заштитата на биодиверзитетот е еден од најголемите еколошки предизвици на денешнината, и во глобални рамки, но и за нашата држава посебно.