„КУМАНОВСКИ“ СЛУЧАЈ
 

           На ден 07.02.2003 година, под сомнение дека се сторители на кривично дело „кражба“, две лица од ромска националност, С.С. (26) и М.Д. (25) биле приведени во полициската станица во Куманово. При приведувањето, извршен бил претрес на нивните куќи, без судски налог. Лицето С.С. било претепано во сопствениот двор, пред очите на неговите три малолетни деца и повеќемина соседи.
 
            Лицето С.С. во полициската станица било подложено на жестока тортура во која активно учествувале шест полицајци, кои го тепале со намера да ја признае “вината”. При шестчасовното малтретирање, полицајците користеле дршка од секира и го удирале лицето С.С. во долниот дел од ‘рбетот и во пределот на бубрезите. 
 
            После сето измачување, на оштетеното лице не му е побарана изјава, ниту, пак, од него било побарано нешто да потпише. Полицијата го известила лицето дека вистинските виновници се пронајдени, се извинила за тепањето и го ослободила од полициската станица. Лицето С.С има здобиено тешки телесни повреди во долниот дел од ‘рбетот и модринки по целата глава, за што има и лекарско уверение.

             Лицето М.Д., приведено на 07.02.2003 година заедно со лицето С.С., било задржано во полициската станица  се до 17 часот наредниот ден, кога било ослободено по интервенција на адвокат, ангажиран од неговиот дедо. Во тој период, лицето М.Д. било тепано од страна на двајца полицајци, кои со тупаници го удирале во пределот на главата. Подоцна се приклучиле уште тројца полицајци, кои го удирале лицето М.Д. по сите делови на телото.

 Како резултат на тепањето, лицето М.Д. се здобило со тешки повреди на увото и на главата, како и модринки по целото тело,  за што лицето поседува лекарско уверение. 

            Заедничко и за двете лица се добиените навреди и пцости („мајката циганска“) на национална основа.

            Форумот за правата на Ромите “АРКА” од Куманово, по добиената информација од оштетените лица, ги презеде следните активности:

-          испрати приговори за двата случаи до началникот на СВР Куманово;
-          поднесе претставка до Постојаната комисија за заштита на слободите и правата на граѓаните при Собранието на Република Македонија;
-          испрати пријава до Народниот правобранител на Р.Македонија;
-          во тек е постапка за поднесување кривични пријави до Јавниот обвинител.  

 

 

                                                                           Информацијата ја подготвил:
                                                                           Феат Камберовски,
                                                                           Форум за правата на Ромите “Арка”