луѓе: Игор Тасевски

Со враќање на довербата, проблемите побрзо ќе се решаваат

Професионално ис­­­кус­тво: Дипло­ми­ран книжевник, уред­­­­ник во вес­никот „Де­ни­ца“ и дописник на ТВ Те­ра. 

Ангажирање во гра­ѓанскиот сек­тор: Активно анга­жиран од 1998 го­дина во Центарот за гра­ѓан­ска иницијатива - Прилеп. Моментално асис­тент на програмскиот координатор во ЦГИ,  член на Извршниот одбор и тренер за човекови права.

Хоби и интереси: Читање книги и гледање филмови.

Најтешка одлука: Одлуките не ги делам на тешки и лесни, туку на навремени и правилни и задоцнети и неправилни. Имам неколку задоцнети и неправилни кои направија некои промени во мојот живот, но сепак и од нив научив нешто, односно што и како не треба да се прави. Генерално, никогаш не се каам за ниедна одлука бидејќи верувам дека според времето и условите сум ги донел вистинските одлуки.

Амбиции: Моите амбиции се поврзани со успешна и плодна работа и една убава прошетка низ светот.

Во слободно време чита: Книгата ми е навистина добар другар. Уживам читајќи белетристика. На убавите книги, како на убавите нешта им се навраќам повеќе пати. Моментно препрочитувам некои книги како „Сто години самотија“ од Маркес и „Сидарта“ од Хесе бидејќи уживам во нив, а со секое препрочитување откривам нови нешта во старата книга.

Каде оди во слободно време: На театар, на прошетки со пријателите. Обврзно барем двапати неделно, на средба со другарите на една партија табла или пикадо.

За време на викенди: Викендите ми се резервирани за семејството. Им се посветувам на сопругата и ќерката и се обидувам да надоместам дел од моето отсуство преку неделата. Викендите често ги користиме и за прошетки надвор од градот.

Кој национален/локален проблем го смета за особено важен и зошто:
Тешко е да се направи приоритет на нашите македонски проблеми, бидејќи сите се итни. На листата се проблемите со финансиите, законите, границите (национални и локални), црквата, враќањето на изгубената доверба во институциите на системот, но и меѓу себе, невработеноста и многу други. Ако морам од многуте проблеми да изберам еден, тоа е изгубената доверба. Кога на народот ќе му се врати довербата во институциите на системот, а секако и меѓусебната доверба, тогаш и проблемите брзо ќе се решаваат.

Кој глобален проблем го смета за особено важен и зошто:
Тероризмот, трговијата со луѓе, дрога и оружје, корупцијата и огромниот прилив на некон­тролиран профит од криминални деј­ствија, перењето пари, финансискиот криминал или криминалот во високата техно­логија, се закана за мирот и стабилноста во светот. Во секој случај, тероризмот е моментно посебно важен проблем, бидејќи истиот зазема се поголем замав и секојдневно носи голем број невини цивилни жртви. Застанувањето зад некоја и некаква идеја која подразбира убивање невини луѓе е најголемиот проблем на денешницата. Едноставно светот треба да се запраша зошто ни се случува ова и да посвети доволно внимание и за негово сузбивање, а не да се концентрира во пронаоѓање и изработување поново и посовремено оружје.

Што би променил во Македонија и во светот:
„Светот го разбирам како поле за културен натпревар меѓу народите“ е мислата на Гоце Делчев, која доколку би ја прифатил светот, секојдневно би уживале во нови книги, филмови, театарски претстави... Не би се згрозувале од вестите за војни, жртви и несреќи. Тоа е мојот свет.

Совет/порака:
Никогаш не правете го она што не сакате да ви го прават вам. Не се подгот­вувајте за посебни настани и денови, зашто секој ден и миг е посебен и заслужува ваше целосно внимание. Насмевнувајте им се на луѓето - нека ве паметат по ведрината и насмевката.

Никогаш не би можел да:
Ги разберам луѓето кои се полни со злоба и завист. Оние кои својата среќа се обидуваат да ја градат на туѓа несреќа.