Претставување

"СИНЕРГИЈА" - ШТИП

Здружението за хуманитарни активности, “Синергија”, е основано на крајот на минатата година во Штип од група ентузијасти, под мотото “Нашите дела нека зборуваат погласно од зборовите” . Како што кажува името на здружението, нивната цел е квалитетно обединување на позитивна творечка енергија во остварување на целите на Здружението.
А, целите на “Синергија” се развивање и хуманизација на односите меѓу општествените групи, остварување на хуманитарни активности, изнаоѓање механизми за остварување на правата на жената и детето, поттикнување на меѓукултурната соработка и унапредување на културата на живеење.
За да ги оствари овие цели, во планот на оваа година, “Синергија” зацрта активности како: помош и хуманитарни односи; оспособување на маргинализирани групи на граѓани за нивно ангажирање во јавниот живот; разрешување на конфликтите и насилствата во училиштата; зајакнување на врските меѓу граѓаните и заедницата, локалниот, јавен и приватен сектор; поттикнување на креативноста, социјализацијата и заемното почитување на децата; намалување на сиромаштијата и формирање на мрежа за глобална акција за мир и меѓународна соработка. По повод Божиќните празници, здружението организираше хуманитарна акција за деца без родители, спонзорирана од фирми и граѓани од Штип по која следеше промоција на здружението на 9 јануари 2003 год. проследена со пригодна програма.
Прв проект на ова Здружение е "Психосоцијална реинтеграција на деца без родители", поддржан од ФИООМ во програмата Уметноста за општествена промена. Основната цел на овој проект е креирање позитивни промени во свеста на децата, развивање на хуманоста преку уметничкото творење и социјализирање на децата. Целна група се децата од основните училишта "Ванчо Прќе", "Гоце Делчев"и "Тошо Арсов" од Штип, чии живот испишал драма, трагедија, секоја тажна, болна на свој начин. Имплементацијата на овој проект почна во месец март и ќе трае до средината на јуни 2003 год. Мотото на проектот е “Животот тече понатаму – насмевни се”.
На денот на жената ЗХА "Синергија", со покровителство и поддршка на градоначалникот на Штип, организираше дружење со мајките на децата од целната група.