Одбележана Меѓународната недела на сиромаштијата

Во Македонија една третина од населението е на работ на преживувањето

Меѓународната недела на сиромаштијата во Ма­ке­до­нија, во ок­том­ври, беше одбележана со седумдневен карван низ не­колку општини. Секој ден од неделата, во различна општина, бе­ше посветуван на по една од осумте Милениумски развојни цели: на коишто се обврзаа земјите членки на Обединетите нации, за ис­коренување на сиромаштијата, преполовување на ширењето на сидата и создавање елементарни услови за живот за секого.  Ка­рванот се одвиваше под мотото “Помислете и на нас”, во организација на Црвениот крст на Македонија, а активностите ги организираа општинските организации. Целта на кампањата бе­ше подигање на јавната свест за проблемите на сиромаштијата, како и изнаоѓање фондови за помош на социјално загрозените се­мејства.

Во рамките на одбележувањето на неделата, беше организирано и собирање средства преку вредносни бонови од 20 денари кои­што беа дистрибуирани преку училиштата, фирмите, маркетите и компаниите. Во училиштата беа организирани и предавања, а во секоја од посетените општини беа отворени и пунктови за при­би­рање храна којашто потоа им беше донирана на социјалните случаи. 

Според презентираните светски податоци, околу 800 милиони лу­ѓе се гладни, а во Македонија таа бројка достигнува до 600.000 или една третина од вкупното население. Само за 4 години, бројот на сиромашните се зголемил за 120.000 луѓе, а најголемиот број од нив живеат под границата на сиромаштијата од 2 долари на ден. Најсиромашни се младите, необразованите, жителите на руралните делови и некои од малцинствата, како Ромите.               

                С.Н.