Хуманитарен концерт на Тоше и пријателите Собрани 28.000 евра за Клиниката за детски болести Со химната на УНИЦЕФ “За овој свет”, испеана од учениците од училиштето за деца со оштетен вид “Димитар Влахов” и македонската поп-ѕвезда Тоше Проески започна хуманитарниот концерт кој се одржа на почетокот на декември на скопското Сајмиште. На македонските ѕвезди им се при­дружија и нивните колеги и пријатели од прос­то­рите на бивша Југославија - Ања Рупел, Тони  Цетински и Леонтина кои заедно со Есма Реџепова, гру­пата “Синтезис” и гудачкиот ор­кес­тар “Џорлеви”  пееја и собраа 28.000 евра за Кли­никата за детски болести, поточно за Одделот за хематологија, којшто со донираните средства треба да се ренови­ра, а предвидено е и купување дополнителна опрема. Пред самиот почеток на концертот Одделот за хематологија го посетија Тоше Проески заедно со Ес­ма Реџепова и гостинот од Хрватска Тони Цетински, а на нивната посета најмногу се израдуваа дечињата-пациенти.  На Одделот за хематологија веќе подолго време му е потребно реновирање и дополнителна опрема, а средства за оваа намена не можат да се добијат од државата. Инаку, државата кога е во прашање и  хуманитарен концерт не отстапува од должноста наречена плаќање данок, па така од собраните 28.000 евра, пет илјади евра ќе мора да бидат ставени во државната каса. М.К.